5 Dane Yusup Matemu Sareng Para Semetonnyane
5
Kaceritayang masan sayah sane ageng rauh ring saluirin jagate.
Nanging ring Mesir,
dane Yusup sampun nyimpen gandum sane akeh pisan.
Punika mawinan akeh anake rauh ka Mesir jagi numbas gandum.
Kenten pada dane Israel mireng indik ring Mesir wenten gandum.
Punika mawinan dane nunden okan-okannyane luas ka Mesir jagi numbas gandum irika,
mangdane ipun sami mresidayang tetep idup.
Irika raris dasa diri okan dane Israele mamargi luas ka Mesir.
Nanging dane Israel nenten ngicen okane sane paling alit inggih punika dane Benyamin sareng luas mrika.
Dane Benyamin puniki semeton dane Yusupe saking ibu asiki.
Krana masan sayah sane ageng,
punika mawinan akeh anake saking negara anak Yahudi rauh ka Mesir jagi numbas gandum.
Saking anake sane akeh punika,
wenten pada okan-okan dane Israele.
Duk punika,
dane Yusup sampun dados pengede agung ring negara Mesir.
Dane sane kuasa ngadol gandum kapining anak saking bangsa lianan.
Sekancan anake musti tangkil ring dane Yusup,
mangda sida numbas gandum.
Kenten pada okan-okan dane Israele tangkil ring dane Yusup.
Ipun sami nyembah dane Yusup kantos muannyane nganteg ka tanahe.
Ritatkala dane Yusup nyingak ipun sami,
pramangkin dane eling kapining ipun,
nanging dane mapi-mapi nenten uning ipun sami.
Irika dane Yusup nengkikin ipun sami saha mabaos,
“Uling dijake awake makejang ene?”
Raris ipun sami matur,
“Titiang sami rauh saking negara anak Yahudi jagi numbas gandum.”
Irika raris dane Yusup eling ipian danene idumun sane sampun naenang kaceritayang ring ipun sami.
Raris dane mabaos sapuniki,
“Awake teka mai,
sinah dadi mata-mata ane mreksa panegarane ene.”
Nah irika,
okan-okan dane Israele ngutsahayang nyeritayang kapining dane Yusup yening ipun nenten ja mata-mata.
Ipun matur sekadi puniki,
“Inggih ratu,
titiang sami puniki nenten ja mata-mata.
Titiang sami rauh mriki wantah jagi numbas gandum.
Titiang sareng sami puniki masemeton saking bapa sane asiki.
Titiang sami puniki anak jujur.
Titiang sami nenten ja mata-mata.”
Nanging dane Yusup tetep nuduh ipun sami tur mabaos,
“Awake teka mai,
sinah dadi mata-mata ane mreksa panegarane ene.”
Irika ipun sami masaur,
“Titiang sami puniki masemeton sareng roras diri saking bapa asiki ring negara anak Yahudi.
Nyaman titiange sane paling alite nenten kicen sareng mriki olih bapan titiange.
Lan sane adiri sampun nenten kari.”
Nanging dane Yusup ngraos,
“Pastika suba,
awake makejang mata-mata.
Makejang raos awake ene musti kabuktiang.
Tunden ja aukud uling awake makejang ene mulih ngalih nyaman awake ane paling cerik ento.
Lan ane lenan bakal kakrangkeng di buine dini.”
Raris,
ipun sami kakrangkeng ring buine tigang rahina suennyane.
Risampune tigang rahina,
irika raris dane Yusup ngraos kapining ipun sami sapuniki,
“Tiang anak ane bakti lan satinut kapining Sang Hyang Tunggal.
Ane jani laksanayang ja prentah tiange apanga awake makejang tetep idup.
Yen saja awake makejang anak jujur,
aukud uling awake makejang tetep kakrangkeng di buine dini.
Ane lenan dadi mulih ngaba gandum.
Ento apanga kaluargan awake nyidang madaar.
Nanging nyaman awake ane paling cerike ento musti kaajak mai tangkil ka arepan tiange,
apanga dadi bukti makejang raos awake ento yakti.”
Irika raris okan-okan dane Israele pada saling ngraos sekadi puniki,
“Ne suba sasajane,
jani iraga nerima panadin dosan iragane tekening adin iragane ipidan.
Ento makada iraga katiben sengkala.”
Ipun sami nenten uning dane Yusup prasida ngerti basan ipune krana ipun sami ngraos sareng dane Yusup nganggen juru salin basa.
Irika raris dane Yusup medal saking genahe punika,
raris dane nangis.
Risampune dane mresidayang negtegin manahnyane,
raris dane mawali ka genahe punika tur dane mrentahang mangda dane Simeon kacangkling tur kakrangkeng ring arepan ipune sami.
Risampune kenten,
dane Yusup mrentahang pemimpin pengayah ring umah danene mangda nagingin gandum ring karung-karung semetonnyane.
Lan jinah ipune sane kaanggen naur gandume punika kacelepin ring karung-karunge punika.
Taler dane Yusup ngicen ajengan kaanggen bekel ring pamargin semetonnyane.
Wusan asapunika,
para semeton danene mamargi budal.
Ritatkala ipun sami merarian ring tengahin pamarginnyane,
ipun nyingak jinahnyane wenten ring karungne suang-suang.
Punika mawinan ipun sami pada jejeh pisan.
Ritatkala ipun sami sampun rauh ring umahnyane,
ipun nyeritayang sekancan sane sampun mamargi ring ipun sami tatkala ipun ring negara Mesir.
Kenten pada yening ipun jagi mawali ka negara Mesir,
ipun sami musti ngajak arin ipune sane paling alit.
Tatkala dane Israel mirengin paindikane punika,
manah danene sebet pisan.
Krana dane sampun kelangan okan danene inggih punika dane Yusup lan dane Simeon.
Dane Israel nenten ngicen okannyane sane paling alit sareng luas ka Mesir.
Samaliha dane Israel sebet pisan yening jagi kelangan malih okan danene sane paling alit punika.